LEGAZPI CITY-Piglalaoman na makakaabot na ngonian na hapon sa Pag-asa Island an mga youth volunteer kan Atin Ito Coalition na lunad kan MV Kapitan Felix Oca ngani personal na mag-abot kan mga kinakaipuhan na suplay sa mga residente asin komunidad sa nasabing isla.
Bago an saindang pigaabangan na pag-abot sa Isla, manlain-lain na aktibidad muna an pigsasagibo kan mga boluntaryo sa ibabaw kan barko mantang nagba-biyahe pasiring sa West Philippine Sea.
Segun sa report, nagkondusir nin sunset yoga session an mga jovenes kasuodma, aldaw nin Biyernes, sa mismong deck kan MV Kapitan Felix Oca ngani na mamantenir an saindang marhay na kamugtakan asin pagigin handa sa misyon.
An nasabing aktibidad parte sana kan serye nin mga programang pighahanda kan mga sakay kan barko poon kasudma, Mayo 1.
Apwera kaini, nagkaigwa man nin film screening an mga volunteers kun sain pinagtutukar an isyu kan West Philippine Sea, siring man an rap workshop ngani na mas mapakusog pa an pagkasararo kan mga nagpartisipar.
Sa pagromdom kan Labor Day, nagkaigwa nin programa an grupo sa pagtaong onra sa mga Pilipinong parasisira asin frontline workers na padagos na naghahanapbuhay asin nagbabantay sa teritoryo kan nacion.
