LEGAZPI CITY- Nasakote kan mga otoridad an sarong tirador nin TV sa mga eskwelahan sa probinsya kan Albay.
Segun kay PCPT Alex Alcantara, Officer in Charge kan Malilipot Municipal Police Station sa intrevista kan Bombo Radyo Legazpi na naarestar an suspetsado sa isinagibong follow up operation sa pagtatarabangan kan mga nagkapirang unit sa probinsya.
Pigtaram kaini na binisto an suspek na si “Boy MTV”, 25 anyos, soltero asin residente kan Brgy. Bantayan, Pilar Sorsogon.
Base sa saindang inisyal na imbetigasyon, luminaog an suspek sa sarong eskwelahan asin rinaot an mga padlock asin hinabon an sarong Smart TV nagkakakantidad nin P47,000.
Segun pa kay Alcantara na nasusog ninda an lokasyon kan suspek nin huli man sa mga CCTV footages asin sa pakikipagtabangan kan mga nagkapirang testigo.
Nakipagkoordinar na man ini sa mga kataraid na mga hepatura ngani maaraman su mga iba pang pighabon kan suspetsado nin huli ta may mga nabiktima na ining ibang eskwelahan sa probinsya kan Albay.
