Kamawotan ngunian kan grupo kan mga paratukdo sa nasyon na matugunan kan gobyerno an pagtatao nin dakulang budget sa sektor kan edukasyon ngunian na taon.
Kun magigirumduman, ipigduon ni Presidente Ferdinand Marcos Jr. kasuudma sa nangyaring pag-urulay ninda kan Department of Education Sec. Sonny Angara na kaipuhan nin dakulang budget allocations an itao para sa DepEd sa ibong kan pagtapyas sa pondo kaini ngunian na taong 2025.
Segun kay Benjo Basas, Teachers Dignity Coalition Chairperson sa intrevista kan Bombo Radyo Legazpi, madali suboot na sabihon na tataasan an pondo alagad dae pa ninda sierto kun ano an bago sa pinag-ulayan kan Presidente asin sa lado kan DepEd.
Segun pa sa opisyal na saindang susuportaran asin papasalamatan an gobyerno kun makakapagdara ini nin karahayan sa sektor kan edukasyon.
Liwat man na pigduon kan TDC na prayoridad an pagpapalangkaw sa sweldo kan mga paratukdo, patatao nin magkakanigong benipisyo asin proteksyon ngani na mas maging matibay an saindang pagtuturo asin pag- aataman sa mga estudyante.
Sa ngunian, sadit suboot an pondo na ipiglaan sa DepEd kun saen mas halangkaw man liwat an budget para sa DPWH kun kaya hagad kaini na matugunan kan gobyerno an mga pangangaipo sa sektor kan edukasyon.
