LEGAZPI CITY-Nakabalik na an nasa 230 pamilya sa Barangay, Anoling sa banwaan kan Camalig, Albay makalihis an pagbagsak kan Pyroclastic Density Currents o Uson hale sa Bulkang Mayon.
Segun kay Kap Mia Alemania, sa intrevista kan Bombo Radyo Legazpi na na-decamp na an mga pamilya asin tinugutan kan NDRRMC na makabalik an mga residente sa saindang mga harong.
Sinabi kan opisyal na dai pa pwedisir ilipat an mga residente na nasa 7km extended danger zone hasta sa dai pa itinataas sa alert level 4 an Bulkang Mayon.
Sa presente, nakahanda an mga residente na mag-ebakwar sa temporary shelter sa Tagaytay Elementary School enkaso liwat na mag-alburuto an Bulkan.
Padagos man an pag-distribwir nin asistensya asin food packs sa mga residenteng nakapag-decamp na.
Mientras tanto, pighahalat na man ninda an datos hale sa LGU kan mga nagadan na livestock asin apektadong pananom.
Dugang pa kan opisyal, nasa 212 na pamilya asin paraooma an nakaresibe na nin asistensya poon kan magpahiling nin aktibidad an Bulkang Mayon.
Alagad, sa ngonian na totally damage an saindang mga pananom, kinakaipuhan ninda an alternative livelihood afuera sa mga mga basic needs o food packs, siring man an panggastos sa uru-aldaw.
