LEGAZPI CITY-Nagluwas na an resulta kan mga nakapasar sa March 8, 2026 Civil Service Pen and Paper Examination kun sain nasa 1,307 an nakapasar sa Professional Level asin 138 naman sa Sub Professional Level.
Segun kay Civil Service Commission Regional Office V Regional Director Atty. Daisy Bragais sa intrevista kan Bombo Radyo Legazpi nabahagyang nagbaba an passing rate kan Civil Service Examination sa rehiyon.
Nasa 17.6 % an passing rate ngonian na bulan kan Marso sa rehiyon mantang nasa 19.30 % ini kan nakalihis na taon sa kaparehong bulan.
Dagdag pa kan opisyal na mas nagdakol an numero kan mga examinees ngonian na taon na nasa 13, 893 kumparar kan nakalihis na taon, na nasa 13, 397 sana.
Sinabi pa niya na makamundo ini huli ta nagbaba an numero kan mga nakapasar asin warang nakalaog sa Top 10 List of Topnotchers nationwide.
Tinawan linaw kan opisyal na importante an makapasar sa CSE ngani magkaigwa nin career service eligibility na magagamit sa paghanap nin trabaho sa gobierno.
Dugang pa niya na kadakol sa ngonian an mawot maglaog sa gobierno huli sa job security asin bilang serbisyo sa publiko.
Gaganapon man an masunod na filing kan exam sa Agosto 9, 2026, kun kaya pige-enganyar an mawot mag-exam na mag-rehistro sa saindang eServe.
Mientras tanto, abilable naman an saindang policy preferential rating para sa mga OFWs kun sain makakuwa sinda nin CSC eligibility sa paagi kan pag-aaply digdi. Para ini sa mga nag-exam na OFWs alagad dai nakapasar mantang igwang 70+ na rating, na pwedisir nindang magamit para sa dagdag na puntos.
