LEGAZPI CITY-Nilinaw kan Bicol International Airport (BIA) na padagos an saindang operasyon sa ibong kan aktibidad kan Bulkang Mayon.
Segun kay Bicol International Airport General Manager Roland Bocito, sa intrevista kan Bombo Radyo Legazpi na nasa normal operational status sinda kun sain nakakalapag asin nakaka-depart an mga scheduled flights sa tamang oras.
Nagkansela sinda nin biyahe kan Mayo 3 para sa duwang flight alagad nagpadagos an iba sa regular na operasyon mantang igwang aktibidad an Bulkang Mayon.
Nagpaluwas na man an Civil Aviation Authority of the Philippines (CAAP) central office nin advisory sa airline operator, aircraft operator, general aviation stakeholders mapadapit sa air space restriction harani sa Bulkang Mayon.
Dagdag pa kan opisyal na mas kadakol na pasahero enkaso igwang aktibidad an Mayon.
Mientras tanto, pigaasigurar man ninda na safe an mga flight asin dai man naapektaran nin ashfall.
Nakapagpadara man an CAAP nin kawani para sa ashfall clearing operation sa mga apektadong lugar.
Posible suboot na makaapektar ini sa mga flight depende kun magbago an direksyon kan paros.
Pagirumdom kan opisyal sa mga pasahero na regular na i-check an saindang flight schedule asin magsunod sa patakaran kan mga ofisina asin operators kan airport ngani magin maayos an saindang mga biyahe.
