LEGAZPI CITY—Arestado kan mga otoridad an pigkokonsiderar na Most Wanted Person kan Bicol sa kasong statutory rape sa Purok 1, Brgy. San Fernando, Sto. Domingo, Albay.
Segun ki Sto. Domingo Municipal Police Station Public Information Officer Police Corporal Arlene Balean, sa intrevista kan Bombo Radyo Legazpi, napag-araman na 15-anyos an biktima asin 19-anyos an suspek, na ilusyon kan babae kan nangyari an insidente.
Nangyari an insidente pagkatapos kan irinuman kan nasambitang mga persona.
Makalihis suboot na nasa impluwensya na nin arak an babae, digdi na suboot ginibo kan suspek an krimen na warang pagtugot gikan sa biktima.
Sa bisa kan mandamiento de aresto na may kasong 3 counts of statutory rape asin warang pigrerekomendang piyansa, tulos na naarestar an suspek.
Sa presente, nasa kustodiya na kan Sto. Domingo MPS an suspek para sa magkakanigong disposisyon.
Mientrastanto, nagpagiromdom man si Balean sa mga kajovenesan na may mga ilusyon na mag-report sa saindang opisina en kaso may mga ginibong bagay an saindang ilusyon na labag sa saindang boot.
Siring man na dae tulos na mag-iba sa mga bako kabistong mga indibidwal nganing maibitaran an siring na insidente.
