Sarong lalaki an nakaligtas makalihis pagtitigbason kan saiyang tugang sa Barangay 19, Bigaa, Legazpi City.
Segun ki Legazpi City Police Station Public Information Officer Police Executive Master Sergeant Carlos Paña sa intrevista kan Bombo Radyo Legazpi na binisto an supetsado na sarong 44 anyos mantang an biktima na tugang niya an nasa edad 34 anyos.
Susog sa saindang imbestigasyon, nagpoon an insidente makalihis na magsumbong an saindang pamangkin sa suspetsado na may pigtaram saiya an biktima na dae niya nagustuhan.
Sa dagit kan suspetsado asin dara man kan impluwensya nin arak an sinugod kaini an biktima asin pinagtitigbas an biktima kun sain tinamaan ini sa walang too kan saiyang kamot asin tulos na isinugod sa haraning ospital.
Pigtaram pa kan opisyal na nakuwa ninda sa pinangyarihan kan krimen an ginamit na sundang sa paninigbas asin nakatalaang gamiton bilang ebidensya enkasong magsunad nin kaso an biktima.
Posible suboot na mahampang an suspetsado sa kasong attempted murder na wara pang rekomendadong pyansa para kuta sa saiyang libertad.
Sa presente, nagtetenir na nagpaparahay an biktima sa Bicol Regional Hospital and Medical Center mantang pighahalat an saiyang desisyon kun susunadan nin kaso an saiyang tugang.
Huli kaini, nagpagirumdom si Paña sa publiko na dae pagpa-iralon an init kan payo urog na kun naka-inom asin pwedesir magdulok sa barangay nganing malikayan an siring kaining insidente.
