Nagpalayog an mga South Koreans nin lobo na may nakasabit na USB, radyo asin tugtog nin Kpop pasiring sa North Korea.
Ini an bilang balos sa haros 1,000 na mga lobo na may basura na pinalayog man kan North Korea pasiring sa nasyun.
Nasa 10 lobo an pinalayog kan grupong “Fighters for Free North Korea” na kompwesto nin mga aktibista asin dating residentes kan North Korea na nagdulag pasiring sa South Korea.
Kasabay pa sa pinalayog an nasa 200,000 na leaflets na may mensahe kontra kay North Korean supreme leader Kim Jong Un asin mga USB drives na may mensahe ni South Korean President Yoon Suk Yeol.
Sa ngunyan nakaalerto an mga suldado kan South Korea sa posibleng balos na gigibohon kan North Korea.
Haloy ng magkalaban an duwang nasyun magpuon pa kan 1950’s kung nuarin nangyari an Korean war na naghaloy nin tolong taon o hasta 1953.
Parehong nagtutubod an South asin North Korea na sinda an lehitimong may kontrol sa kabilugan kan Korea asin nagpaplanong pagsaruon ini sa maabot na panahon.
