LEGAZPI CITY – Ikinaugma kan Sorsogon Police Provincial Office an magkasunod na anti drug operation na nagresulta sa pagkakadakop kan mga personang may dara nin mga ilegal na kontrabando sa Matnog Port.
Segun ki Sorsogon Police Provincial Office Spokesperson Police Major Arwin Destacamento sa intrevista kan Bombo Radyo Legazpi na pigkokonsidera ninda ini bilang sarong dakulang akomplisyemento huli ta pinagtarabangan ini kan manlain-laing law enforcement agencies nganing dae ini maipuslit pasiring sa mga rehiyon kan Visayas asin Mindanao.
Nakisumaro man suboot an kapulisan sa matrayumpong joint seaport interdiction operation nagresulta sa pagkaka-kompiskar kan pigkakarkulong P74.8 Million na kantidad kan pigtutubudang shabu.
Afuera pa suboot sa interdiction operation an nasakote man ninda an sarong babae na pigporbaran mang magpuslit nin kaparehong droga asin ipiglaog sa maselang parte kan saiyang hawak.
Pigtaram pa kan opisyal na maski anong tago kan siisay man na persona an mga dara nindang kontrabando an mahihiling ninda asin dae makakalusot huli sa mahigot na pagbabantay kan Philippine Ports Authority (PPA) asin kan polisya.
Promesa niya man na dae sinda mapupundo sa pagsiyasat sa mga posibleng ilegal na kontrabando asin dae ninda papabayaan na mailuwas o mailaog ini pasiring sa rehiyon.
