LEGAZPI CITY- Nagpahayag nin suporta an Simbahang Katoliko partikularmente an Diocese of Legazpi sa pagpapadagos kan gobyerno sa kampanya kaini kontra iligal na droga.
Napag-araman kaya na nagtao na nin go signal si Presidente Rodrigo Duterte sa Philippine National Police (PNP) ngani na liwat nang magsagibo nin mga anti-drug operations.
Katakod kaini, positibong sinabi ni Father Rex Arjona na sususportaran kan Simbahan an ano man na lakdang kan gobyerno para sa paz y orden sa nasyun.
Alagad hagad kan padi na atamanon man giraray kan mga pulis na ma-implementar kan war on drugs an buhay kan mga tawo asin an pag-utob sa ley.
Dakol kaya suboot an magagadan na inosenteng tawo kun dae susunudon kan PNP kun ano an ipigtalaan kan ley na proseso.
Tinawan duon ni Father Arjona na an tama sana an saindang susurugon sa nasambitan na kampanya.
Inako man kaini na nahahandal sinda na baad liwat na mangyari an mga garadanan katakod kan war on drugs alagad parte suboot kan obligasyon kan publiko an magin kumpyansa man giraray sa mga ahensya kan gobyerno na maggibo nin tama.
Kun kaya pakiolay ni Father Arjona sa PNP na gibuhon sana kun ano an magkakanigo ngani na dae magtinir an kumpyansa kan mga namamanwaan sa Pilipinas.
