Nagbutas na bilang legal counsel ni dating Presidente Rodrigo Duterte sa International Criminal Court (ICC) si Atty. Nicholas Kaufman makalihis magtapos an saiyang sarong kontrata kan Marso 31, 2026.
Sa isinunad na resignation ni Kaufman sa ICC na may petsang Mayo 8, sinabi kaini na napagkasunduan niya asin ni Duterte na tapuson an saindang professional engagement.
Nakapili na man suboot an dating presidente nin bagong abogado na makapot sa saiyang depensa sa pigkakahampang kaining kasong crimes against humanity katakod kan kontrobersyal na ‘war on drugs’ kan saiyang administrasyon.
Segun pa ki Kaufman, nakaolay na niya an bagong legal counsel ni Duterte asin sienerto man suboot kaini na tulos na tanggapon an kaso, kabale an paghampang sa masunod na paglilitis kan ICC na nakatakda sa Mayo 27, 2026.
Sienerto man ni Kaufman na may supisyenteg eksperyensya sa ICC an maribay na legal counsel kan dating presidente kaya dae maaapektaran o maoctaban an dalagan kan kaso ni Duterte.
Kasabay kan saiyang pagbutas, naghagad man si Atty. Kaufman nin pormal na permiso sa ICC nganing makapag-withdraw bilang counsel, alinsunod sa proseso asin regulasyon kan korte.
Afuera digdi magtitinir na confidential ang gabos kan impormasyong may kinaaraman sa kaso kan dating presidente maski tapos na an professional relationship ni Kaufman digdi.
Sa presente wara pang pigluluwas na pahayag ang kampo ni Duterte mapadapit sa pagkakakilanlan kan bagong legal counsel kaini.
