LEGAZPI CITY—Sarong fetus an suboot itinapok sa bintana kan CR sa sarong ospital sa probinsya nin Catanduanes.
Segun ki Police Lieutenant Rey Manguerra kan Virac Municipal Police Station, sa intrevista kan Bombo Radyo Legazpi, susog sa saindang initial na report, may nadukayan na sarong fetus sa Catanduanes Doctor’s Hospital Inc. (CDHI) sa Barangay Valencia sa banwaan kan Virac kan naunambitang probinsya.
Segun sa opisyal, bandang alas-10 nin pagkaaga kan nakalihis na aldaw nai-report sa saindang opisina an mapadapit sa insidente.
Dugang kaini na an fetus pinagtutubudang iwinalat kan saiyang ina.
Sa presente padagos pa an imbestigasyon kan mga otoridad sa naunambitang aksidente.
Mientrastanto, nangapudan man an opisyal sa mga magurang na ipag-monitor an saindang mga kaakian sa saindang mga piggigibo sa uro-aldaw asin kun may problema an saindang aki dapat ninda ining tabangan bakong paghusgahan.
Tinawan-doon man kaini an kaimportansyahan kan komunikasyon sa laog kan harong asin pamilya.
