LEGAZPI CITY – Nasakote kan mga otoridad an apat na high value drug personality na kinababalehan kan sarong dismissed na police asin sarong high school student sa isinagibong drug buy-bust operation kan pinagsarong pwersa kan Philippine Drug Enforcement Agency (PDEA) Albay, PDEA Masbate asin Ligao City Police Station sa Barangay Tuburan, Ligao, Albay.
Segun ki PDEA Albay Provincial Director Noe Briguel sa intrevista kan Bombo Radyo Legazpi na nadiskubre ninda na pigagagmit kan seller an saiyang residensya nganing gamiton na hideout o drugden kan saiyang mga parokyano na mga parabulang.
Pinabakalan kan sarong suspetasado an saindang undercover agent nin shabu asin napag-araman na nasa kaparehong lugar man an pigkukuwaan kaini nin ilegal na droga.
Nakuwa sa lugar an 12 sachet kan shabu, buy-bust money asin kadakol na drug paraphernalia na nagpapatunay na sarong drug den an residential area kan sarong suspetsado.
Pigtaram pa kan opisyal na bako ini an mga natural na klase kan saindang nadadakop nin huli ta bako improvised kundi talagang may mga kagamitan an mga ini nganing makagamit kan mga kontrabando.
Base sa saindang poser buyer sa saindang isinagibong operasyon, pigkakarkulong poco mas o menos 12 grams an nakumpiskang shabu asin may estimated street value na P66,000.
Sa presente, an ipigsairaraom na an mga nadakop sa drug examination nganing mavalidate na naggagamit sinda kan mga kontrabando asin mahahampang sa manlain-laing kaso an mga ini kun sinda magpositibo.
Pagirumdom kaini sa mga imbwelto sa ilegal na droga na magbago na nin huli ta dae mapundo an saindang mga ahensya asin mga law enforcement agency sa pagdakop sa mga drug courier asin user nganing mawara na an presensya kan ilegal na droga sa provincia.
