LEGAZPI CITY—Kinumpirmar kan Catanduanes Provincial Disaster Risk Reduction and Management Office na an nadukayang lawas sa parte kan Palumbanes Island, Caramoran, Catanduanes iyo an saro sa siyam na nawawarang parasisira puon pa kan Enero 2, 2025.
Segun ki Emergency Operations Chief PDRRMO Catanduanes, Bobby Monterola, sa intrevista kan Bombo Radyo Legazpi, may nakua man na debris harani sa lugar kun saen nakua an lawas kan biktima siring kan styrofoam na pwedesir na piggamit sa pagsisira na kinumpirmar man kan kamidbid kan biktima.
An biktima minidbid na si Kent “Santino” Bordeos Buban, 18-anyos, residente kan Barangay Pawa, Tabaco City, Albay.
Dugang kan opisyal na saindang pigsundo na an pamilya kan biktima para mahiling an paglubong kan lawas kaini sa Pandan, Catanduanes.
Sa ngunyan pighahalat pa ninda an aerial asset na gagamiton para magamit sa search and retrieval operation, siring man pighahalat pa ninda an iba pang impormasyon kan saindang local search groups mapadapit sa mga nawawarang parasisira.
Magigiromdoman na kan Enero 1 an mga nasambitang parasira nagpasiring sa kadagatan na nakatalaan kuta nang mag-uli kan Enero 5, alagad huli sa raot nin panahon dae pa nakakabalik an mga ini sa saindang lugar.
Mientrastanto, nagpagiromdom man an opisyal sa mga parasisira na kun may anunsiyo nin “no sailing policy,” dae na magpirit na magpasiring sa kadagatan para sa saindang kaligtasan.
