Nilinaw kan National Bureau of Investigation (NBI) na pwedesir maghali an contractor na si Sarah Discaya sa saindang opisina huli sa wara pang ipigluwas na warrant of arrest laban saiya.
Segun ki Acting NBI Director Angelito Magno wara sindang legal na basehan nganing pugolan si Discaya sagkod na warang orden gikan sa korte.
Nilinaw man ni Magno na nagtitinir si Discaya sa NBI asin tulos na ipapaotob an warrant en kaso na iisyu na ini kan korte.
Magigiromdomang kusang nagsurender si Discaya kan nakaaging semana makalihis ihayag ni Presidente Ferdinand Marcos Jr. na piglalaomang maluwas nin warrant katakod kan mga anomalya sa flood control projects.
Alagad pinaliwanag kan lado ni Discaya na an pagsurender niya an sarong legal na lakdang asin bako pagtuga kan kasalan.
Enot digdi, si Discaya kaiba an siyam na iba an nahahampang sa mga kasong malversation asin pagbalgar sa Anti-Graft and Corrupt Practices Act katakod kan suboot P96.5-milyong ghost flood control project sa Davao Occidental.
