LEGAZPI CITY-Nagpaluwas nin pahayag an International Criminal Court (ICC) manungod sa report na igwang mandamiento de aresto laban ki Senador Ronald “Bato” Dela Rosa.
Pigklaro kan ICC na wara pang public arrest warrant na pigpapaluwas na may koneksyon sa Pilipinas.
Inabisuhan man kan ICC an publiko na magdangog sana sa mga opisyal na pahayag asin likayan an pagpalakop nin informasyon na bako beripikado sa online.
Enot nang sinabi ni Interior Secretary Jonvic Remulla na naghahanda na sinda nin poco mas o menos 10,000 na task forces nganing arestaron an Senador enkaso igwang iluwas na mandamiento de aresto an ICC.
Alagad, aminado si Remulla na wara pa siyang nareresibeng kopya kaini hale sa ICC.
Magigirumduman na si Dela Rosa nagsirbe bilang hepe kan PNP kan panahon ni dating Presidente Rodrigo Duterte na imbuelto ngonian sa madugong kaso kan war-on-drugs na isinangat mismo sa ICC.
