LEGAZPI CITY—Natakdag sa kamot kan mga otoridad an pigkokonsiderar na Rank 3 Regional Most Wanted Person kan Ilocos na may kasong pang-aabusong sekswal sa probinsya kan Catanduanes.
Segun ki Police Lieutenant Rey Manguerra kan Virac Municipal Police Station, sa intrevista kan Bombo Radyo Legazpi, an suspetsado minidbid na si alyas “Jojo,” 19-anyos, lalaki, sarong laborer, warang agom, residente kan Barangay Pinipin, Sta. Cruz, Ilocos Sur asin presenteng nakaistar sa Barangay Danicop, Virac, Catanduanes.
Sa pinagsarong pwersa kan Virac Municipal Police Station, Catanduanes Criminal Investigation and Detection Group Provincial Field Unit (CIDG PFU), Regional Intelligence Unit, asin Provincial Intelligence Team 6 Catanduanes naarestar an suspetsado sa saiyang pig-iistaran sa Catanduanes.
Susog sa ipinaluwas na mandamiento de aresto kan First Judicial Region Branch 8, Candon City, Ilocos Sur, an suspetsado naarestar sa kasong statutory rape asin rape by sexual assault en koneksyon sa Republic Act 7610 o an Special Protection of Children against Abuse, Exploitation, and Discrimination Act.
Sa ngunyan, an suspetsado nai-turn over na sa mga otoridad sa probinsya kan Ilocos Sur.
