Dinakop an sarong pulis matapos badilon an duwang kairiba kaini sa Barangay Gaddangao, Rizal, Cagayan mga alas 10:00 nin banggi kan Setyembre 13, 2025.
Binisto an suspek na si alyas Pedring, miembro kan Philippine National Police (PNP) asin residente kan Solana, Cagayan.
Basado sa inisyal na imbestigasyon kan mga otoridad, nag-abot suboot an suspek sa FVP checkpoint sa nasabing barangay asin bigla na sanang binunot an saiyang service firearm asin itinutok sa saiyang kaibahan.
An mga kairiba kan pulis na si alyas Jey, residente kan Brgy. Cambabangan, Rizal, asin si alyas Simon, residente kan Brgy. Poblacion, Piat, Cagayan, pigporbaran na pakalmahon an mga ini, alagad pinaputukan suboot sinda kan suspetsado.
Tulos man na idinalagan sa Bulagao District Hospital an mga biktima alagad pigdeklarang dead on arrival si alyas Simon.
Mientrastanto, nagsapo nin tama nin bala sa toong hita si alyas Jey na ibinalyo sa ACE Medical Center para sa dugang na pagbulong.
Tulos man na naarestar an suspek na presenteng nagtitinir na sa kustodiya kan Rizal Police Station para sa magkakanigong disposisyon mantang nagpapadagos an mas hararom na imbestigasyon sa insidente.
