LEGAZPI CITY — Inalerto kan Philippine Institute of Volcanology and Seismology (Phivolcs) an publiko sa posibleng darahon na epekto sa nag-aalburutong bulkang Mayon sa naeeksperyensyahan na mapanganuron na kalangitan sa Albay na nagdadara nin maluya hasta sa moderatong pag-uran.
Segun ki Phivolcs Dir. Renato Solidum, nakadepende an pagbaba kan mga natipon na lahar deposits sa padagos asin makusog na pag-uran urog na sa sirangan asin sur na parte kan bulkan.
Dugang pa ni Solidum na dakol na man an natipon na volcanic materials sa mga channel na komon na agihan kan pyroclastic density current (PDC) siring kan Mi-isi channel sa Daraga, Bonga-Buyuan channel sa Legazpi City siring man sa mga salog na nasa laog kan danger zone kan mga banwaan kan Guinobatan asin Camalig alagad pigpapalikay man giraray sa nagkapira pang salog na nagkokonekta sa iba pang mga banwaan.
Binalikan man kan opisyal an nangyari sa pagputok kan Mayon volcano kan 1984 kun sain nasa 40-milimeter rainfall sana sa laog nin kabangang oras an kinaipuhan sa pagbaha kan mga lahar deposits.
Mientrastanto, enot nang pigduon kan Albay Public Safety and Emergency Management Office (APSEMO) na preparado man an ahensya sa anuman na posibleng mangyari alagad sinierto na nasa salbadong lugar an mga ipig-ebakwar na mga residente.
Sa presente, hibaba pa suboot an rainfall threshold na pigbabantayan badaso sa datos kan PAGASA segun ki Dr. Cedric Daep kaya wara pang huma sa pagbaba kan lahar siring man sa mga pagbaha asin pagrasay kan daga.
