LEGAZPI CITY – Nagtalima na an pirang opisyales kan mga Barangay sa ciudad kan Legazpi sa Anti-Epal policy na ipina-otob kan Department of the Interior and Local Government (DILG) sa enterong nacion.
Magigirumduman kaya na sa irarom kan Memorandum Circular No. 2026-006, pigsugo an gabos na lokal na gobyerno asin opisina kan DILG na tulos na halion an mga pangaran, ladawan, logo, slogan, asin anuman na simbolo kan mga opisyales sa mga proyektong pinondohan kan gobyerno.
Segun ki Punong Barangay Glenn Barcelon kan Barangay Dapdap sa intrevista kan Bombo Radyo Legazpi na pinatanggal niya na an mga may nakabugtak na ladawan niya sa mga tarpaulin na para sa mga trayumpo na saindang naguno asin pag-welcome kan mga malaog sa saindang barangay.
Paglilinaw niya na sa ibong kan dae man kasabay an mga siring na tarpaulin sa ipinagbabawal kan DILG, mas pinili niyang ipa-tanggal ini gabos nganing magpahiling nin kooperasyon bilang miyembro kan Liga ng mga Barangay sa Pilipinas.
Naglalaom man siya na magin panalmingan an saindang ginibong lakdang asin arugon kan mga kapwa niya opisyales kan mga Barangay nganing malikayan an pagkakahampang sa penalidad asin magin patas an laban sa nagdadangadang na Barangay and Sangguniang Kabataan Elections sa maabot na Nobyembre.
Pigtaram pa kan opisyal na nakatalaan nindang palitan an mga congratulatory asin welcome tarpaulin nin mga warang nakabugtak na pandok asin pangaran kan saindang konseho.
Diretsahan niya man na sinabi na banga an saiyang opinyon sa naunambitang direktiba urog nang may mga proyektong pighingoa kan sarong opisyal na sarong paagi man nganing maaraman kan publiko na nagta-trabaho an saindang pig-elihir sa posisyon.
Pigpromesa man ni Barcelon na masunod siya asin kan saiyang Barangay sa nagin kasuguan kan DILG bilang parte kan good local governance na saro sa saindang brand leadership.
 nationwide.){kind=link}