LEGAZPI CITY- Nagpapadagos an ipigkokundusir na imbestigasyon kan mga kapulisan dapit sa nangyaring insidente nin pagsabog sa luwas kan sarong STL outlet sa Legazpi City.
Segun ki Police Major Kharren Formales, tagapagtaram kan Albay Police Provincial Office sa intrevista kan Bombo Radyo Legazpi na nangyari an insidente kan Agosto 13.
Basado sa inisyal na imbestigasyon asin sa nakuwaan kan CCTV sa palibot kan nasabing establishimento, igwang sarong lalaki na may sulog na pulang helmet, itom na jacket asin itom na pantalon an nagpasiring sa hampangan kan nasabing stablishimento asin igwang ipiglaag na sarong bagay.
Makalihis sana an nagkapirang minuto, nadangog na kan mga empleyado kan STL outlet an nasabing pagsabog.
Segun sa opisyal na minor man sana ini asin wara man na nakulugan sa insidente.
Dagdag pa ni Formales na dae pighahali an posibilidad na katuyuhan kan suspek na manakot huli ta pigtaon man na bako marhay matawo sa lugar kan ginibo an insidente.
Katakod kaini, nangapudan an opisyal sa publiko na makipag koordinar sa kapulisan enkasong igwang aram sa pagkakabisto kan suspek na nasa likod kan insidente.
