Pwedesir nang irani sa bagong hotline kan Department of Labor and Employment (DOLE) an mga reklamo asin kahapuran kan mga obrero asin employer katakod kan mga orolay sa trabaho.
Segun ki DOLE Secretary Francis Tolentino, ipiglansar kan ahensya an Hotline 15/30 o “Fifteen Thirty” na bukas 24 oras kada aldaw asin pitong aldaw kada semana.
Nagtagama an ahensya nin 20 agents na masimbag sa mga apod ngani na mas marikas na matugunan an mga concern kan publiko.
Kaibanan sa mga pwedesir i-report an dae pagbabayad o pagka-antala kan sahod asin benepisyo, iligal na paghali sa trabaho, asin iba pang pagbayolar sa labor standards.
Pwedesir man na irani an reklamo katakod sa kaligtasan asin salud sa pinagtatrabahuhan, kaibanan an mga peligro na dara kan matinding init.
Nagreresibe man an hotline dapit sa kahaputan sa paghahanap nin trabaho asin iba pang programa kan ahensya.
Sinierto man ni Tolentino na maire-refer sa laof sana nin sarong aldaw an mga nareresibeng concern sa kaukulang regional o field office kan DOLE ngani na tulos na masuri asin maaksyunan.
Kasabay kaini, nagpatanid man an kalihim kontra sa paggamit kan hotline sa mga prank call ngani na dae masayang an oras asin mapagkaitan nin tulos na tabang an mga obrero na may lehitimong reklamo.
