LEGAZPI CITY—-Nahilingan na sarong dakulang tabang an paggamit nin drone para makarkulo an danyos na pigsapar kan sektor nin agrikultura dara kan raot nin panahon.
Segun ki Raul Montemayor, an National Manager kan Federation of Free Farmers Cooperative Inc. (FFFC) sa intrevista kan Bombo Radyo Legazpi, mas marikas an magigin assessment asin mas tama an datos huli ta an drone pwedeng magkua nin ladawan na nahihiling kaini sa baba gikan sa himpapawid na kun saen mas mahihiling an danyos asin hiwas na sinapar kan sektor nin agrikultura sa panahon kan kalamidad.
Dugang kan opisyal na an drone dakol na pwedeng maitabang siring kan pagdistribuir nin mga binhi sa mga omahan, pesticides, insecticides, fertilizers na kun saen mas mas nakakatipid sa labor asin mapapadali an pagtrabaho.
Sa tabang man kan drone asin iba pang teknolohiya, maaaraman kan mga paraoma kun haen an saindang omahan asin maaaraman kun ano an kamugtakan kaini en kaso may maghagupit na raot nin panahon.
Siring man para maaaraman an sukol o hiwas kan omahan kan mga paraoma.
Mientrastanto, nangapudan man an opisyal na pirmahan na an pagpapahalawig kan mapadapit sa pondo kan rice tarrification law na kun saen mas dakulang pondo an lalaoman kan mga paraoma sa masunod na anom na taon para mapakinabangan na an mga ini.
