LEGAZPI CITY—Nakapagrehistro an Department of Agriculture nin mga panibagong kaso nin African swine fever sa probinsya kan Catanduanes.
Segun ki Department of Agriculture Bicol Spokesperson Lovella Guarin sa intrevista kan Bombo Radyo Legazpi, na susog sa resulta sa saindang laboratoryo nagluwas na may siyam na hog raisers an may mga nagpositibo na mga atamang orig gikan sa apat na banwaan kan Catanduanes.
Nairehistro an apat na hog raisers na nagpositibo sa banwaan kan Virac, duwa sa Bato asin Baras, mantang saro sa banwaan kan San Andres.
Sa ngunian padagos an information campaign para sa mga hog raisers sa mga nasambit na lugar.
Segun sa opisyal na an Department of Agriculture may ipig-ofresir na indemnification sa mga hog raisers na masumiter boluntaryo kan saindang mga atamang orig para sa depopulation kun ini yaon sa laog kan 500-meter radius kan mga ground zero sa nasambit na apat na mga banwaan.
Ipigeksplikar kaini na maabot sa P12,000 an kantidad para sa per head kan breeders asin bull na mga five months old pataas na mga inahin.
Mantang sa mga grower na two months old pataas na bako sarong inahin nagkakantidad nin P8,000 per head.
An mga nakahiwalay na sa inahin o mga darakula nang piglets nagkakantidad nin P4,000, asin an mga pig suckling dae kairiba sa mga mababayadan.
Dugang pa ni Guarin, na nagbubugtak na nin mga checkpoint sa mga apektadong lugar para maibitaran pa an paglakop kan nasambit na helang sa probinsya.
