LEGAZPI CITY – Nagpatanid an NBI sa mga mahilig makipag-amigo sa social media na bistuhong maray an mga nakakaolay online.
Sa isinagibong entrapment operation sa Manila, arestado an sarong lalaking suspek na nagpabistong online mangkukulam.
Pagbubuyagyag ni NBI Cybercrime Division chief Vic Lorenzo sa ekslusibong intrevista kan Bombo Radyo Legazpi, nagpasaklolo sainda an dai na pinangaranang biktima kaini makalihis na hagadan nin P2 million kan suspek.
Dai pa nakuntento, liwat na naghagad nin P100, 000 sa biktima kaya isinagibo an operasyon na nagresulta sa matrayumpong pagkakaarestar kan suspek.
Modus kaini an mag-random messaging sa Facebook, mag-stalk asin amiguhon muna an bibiktimahon kasabay kan pag-aram sa mga kinatatakutan asin iba pang vulnerabilties kaini.
En caso mapakagat, mahumang kukulamon ang biktima o may mangyayaring maraot digdi kapag dai nagtao nin kwarta.
Pig-iimbestigaran na man sa ngunyan kun may iba pa ining kasabwat mantang pig-aaram kun may iba pang nabiktima.
Mahigot an abiso ni Lorenzo na dai magtubod tubod sa mga pananakot asin isumbong tulos sa mga otoridad kun makaeksperyensya kan kaparehong insidente.
Imbes na magtubod sa pangkukulam, mas pakusugon an pagtubod sa Diyos. (with report from Bombo John Salonga)
