LEGAZPI CITY – Preparado an Department of Agriculture (DA) sa pagtabang sa mga Bicolano farmers na piglalaomang maapektaran kan El Niño o peryodo nin tagmara.
Sa ekslusibong intrevista kan Bombo Radyo Legazpi ki DA Bicol spokesperson Emily Bordado, naobserbahan na an sitwasyon kaitong hudyan na quarter kan taong 2018 kaya in-activate na an task force para sa mga preventive measures.
Nagpaotob naman nin kampanya para sa amay na pagtatanom alagad na-delay man giraray mantang an iba an nadestroso pa makalihis an paglaog kan nagkapirang bagyo sa Pilipinas na nakaapektar man sa rehiyon.
Segun pa ki Bordado, natawanan na nin panibagong banhi an mga paraoma para sa rehabilitasyon mantang available na man sa mga municipal asin city agriculture offices an mga variety kan paroy na kakayanon an init o matinding tubig.
Operational na man suboot an tulo sa limang solar-powered irrigation system hale sa sampulong ipigpromesang pasilidad ni Agriculture Secretary Manny Piñol sa Bicol.
Huli man ta kaipuhan nin dakol na tubig para sa pagtatanom nin paroy, abiso pa ni Bordado na pwede man na mongo, mais o okra muna an itanom mantang makipag-koordinar man sa agriculture technician sa iba pang alternatibong pananom sa panahon nin tagtuyot.
Nagrequest na man suboot an ahensya para sa dugang na pondo na parte kan contingency plan sa piglalaomang dakulang pagagastusan.
