LEGAZPI CITY- Nakikipagtabangan na ngunyan an National Irrigation Administration Albay sa mga lokal na gobierno ngani na maresolberan an nadistrosong mga pasilidad na makaka apektar sa mga paraoma.
Basado sa datos kan ahensya igwang labi sa P26 million na kantidad nin danyos makalihis na maraot an walong national irrigation system.
Segun ki National Irrigation Administration Albay Operations head Bernadeth Balingasan sa intrevista kan Bombo Radyo Legazpi na igwa pa nin mga nadistrosong communal irrigation system na may danyos na labi sa P152 million.
Afuera digdi nasa P181 million man an nairehistrong danyos sa mga imprastruktura.
Ipigkakahadit pa kan opisyal na kun dae tulos mari-restore an duwang communal irrigation system sa sarong barangay sa Oas asin Libon, posibleng dae makapag tarok an mga paraoma.
Huli digdi, nagpa plano na an ahensya kan mga lakdang na posibleng ilatag ngani na marikas na maresobleran an problema.
Kinakaipuhan suboot na matutukan an patubig sa nasabing mga lugar ngani na makapagtanom sa masunod na cropping season.
Mientras tanto, nasa 4, 074 hektarya nin tanuman nin paroy na madali na kutang anihon an nadistroso kun sain nasa 5, 253 na paraoma an naapektaran asin katumas nin labi sa P277 million na danyos.
