LEGAZPI CITY-Nakatalaga na an nasa 300 na kapulisan kan Legazpi City Police Station sa manlain-lain na sementeryo sa ciudad para sa obserbasyon kan Undas ngonian na taon.
Segun kay Legazpi City Police Station Acting Chief of Police Police Lieutenant Colonel Domingo Tapel Jr., sa intrevista kan Bombo Radyo Legazpi, na nakadeploy na an saindang mga personnel sa siyam na mga sementeryo sa ciudad.
Nagkakaigwa man suboot sinda nin “Wrist Name Tagging” para sa mga menor de edad na nasa 10-anyos pababa kun sain nakalaag digdi an saindang mga pangaran asin cellphone numbers.
Pigpapaotob suboot ninda ini enkaso igwang nawawarang mga aki sa sementeryo ngani madaki sindang makuwa asin maapudan.
Afuera digdi an igwa man sindang pigpapaotob na iba pang inisyatiba siring kan Police Assitance Desk, Motorist Assistance Center, asin Tourist Assistance Desk bilang dugang na asistensya sa mga mabisita sa mga sementeryo.
Pagirumdom man kan otoridad sa gabos na mahigot na ipinagbabawal an pagdara nin matatarom na bagay siring man na kun pwedeng magdara na nin mga chopped na prutas asin karne ngani maibitaran pagdadara kaini sa kamposanto.
Dapat i-konsidera man suboot an pagrumdom kan iba sa saindang padangat sa buhay sa sementeryo asin kun pwede an ibitaran an pagpapatugtog nin makukusog sa laog mismo kan mga sementeryo.
