LEGAZPI CITY- Wara pa suboot nahihiling na bastanteng rason an Philippine Institute of Volcanology and Seismology (PHIVOLCS) tangarig na maibaba an Alert Level 2 status sa Bulkang Mayon.
Ini an nagluwas sa datos kan ahensya makalihis an isinagibong pag-aadal na pinunan kan katapusan kan Enero kan tulong team hale sa central office sa nasabing bulkan .
Sa intrevista kan Bombo Radyo Legazpi ki PHIVOLCS Director Renato Solidum, nagtetenir na abnormal an mga parametrong pigbabantayan sa nasabing bulkan puon sa paghubag, halangkaw na buga kan asupre, paglaad kan bunganga o crater glow siring man an kabilugang estado.
Dugang pa ni Solidum na harayo pa an nasabing lakdang na pagbaba kan alerto huli ta wara pang klaradong downward trend an bulkan.
Magsasarong taon naman kan ibababa sa Alert Level 2 status an Mayon volcano alagad ipig-eksplikar ni Solidum na bako boot sabihon na maluya na tulos an aktibidad kaini makalihis an mga pagputok urog na igwa pang natatadang suplay nin magma na posibleng mailuwas.
