LEGAZPI CITY- Nagpapadagos an aktibidad na ipigpapahiling kan bulkang Mayon.
Sa nakalihis na magdamlag, nairehistro kan Philippine Institute of Volcanology and Seismology an nasa 313 na rockfall asin 12 pyroclastic density currents o uson.
Na-monitor man an 21 volcanic earthquakes kaibanan na an tulong volcanic tremors na komon na nasa sarong minuto hasta 13 minutos an lawig.
Sa lado man kan pagbulos kan lava, nasa 3.8km na an nairehistro sa Basud gully, mantang nasa 3.2 km na sa Bonga gully asin 1.3 km sa Mi-sy gully.
Padagos man na nairerehistro an panaka-naka asin maluluyang strombolian activity.
An bulkang Mayon an presenteng nasa alert level 3 asin mahigot na pigtututukan kan ahensya.
