Pinasalamatan ni Mary Jane Veloso si Presidente Marcos asin Indonesian President Prabowo magin an gabos na tuminabang para ini makabalik sa Pilipinas makalihis an 14 taon na pagkakakulong sa Indonesia.
Si Veloso nag-abot sa Soekarno-Hatta International Airport kan nakalihis na banggi mantang pabalik na sinda sa nasyon.
Sinabi kaini na mawot niyang magsimba sa Pilipinas.
Kairiba kaining nagsakay sa eroplano an nagkapirang opisyales kan Department of Foreign Affairs (DFA) sa pangengenot ni Undersecretary Eduardo de Vega.
Pag-abot kaini sa Pilipinas nin Miyerkules na aga madiretso tulos ini sa Correctional Institution for Women sa ciudad kan Mandaluyong para sa limang aldaw na quarantine.
Mientrastanto, magigirumdoman na nahahampang sa padusang kamatayan si Veloso makalihis na madakop ining may 2.6 kilos nin heroin sa Indonesia kan 2010.
Kan taong 2015 paramientras na kinanselar ni Indonesian President Joko Widodo an saiyang pagbitay.
Mantang kan nakaaging bulan nin Nobyembre nagkaigwa nin kasunduan an Pilipinas asin Jakarta para ilipat sa nasyon si Veloso.
