LEGAZPI CITY- Apektado an nagkapirang delegado kan Private Schools Athletic Association sa maluya asin malabo na suplay nin tubig sa nagkapirang mga billeting centers.
Nagresulta an problema sa pagkakarigos kan nagkapirang mga atleta na nagtetenir sa Pawa High School sa barangay.
Segun ki Legazpi City Water District General Manager Rico Salazar sa intrevista kan Bombo Radyo Legazpi na nagkaigwa nin problema sa pressure huli sa naraot na tubo kan PhilHydro.
Katakod kaini, nagkaigwa nin mga flashing activities kaya nagin malabo an tubig na nai-supply sa nagkapirang mga consumers.
Kaibanan sa mga naapektaran an nagkapirang mga billeting centers.
Sa parte man kan Gogon Elementary School, napag-araman na naraot an water pump kaya nagkaigwa nin diit na problema.
Paliwanag pa ni Salazar na an purifier an presenteng nasa testing stage pa asin ngunyan na igwang Private Schools Athletic Association, posibleng i-reschedule an testing sa masunod na bulan.
Dugang pa kaini na an mga areas na igwang maluyang suplay nin tubig an padiit-diit ng nagadugang nin pressure.
Mientras tanto, nangapudan man an opisyal na pagsabot asin naghagad nin dispensa sa gabos na mga apektado kan isyu sa suplay kan tubig.
