Aminado an lokal na gobierno kan Quezon City na dakulang angat para sa sainda na maabot asin malagpasan an nagin trayumpo kan hosting kan Agusan del Sur sa Palarong Pambansa 2026.
Sa intrevista kan Bombo Radyo kay Mayor Joy Belmonte, inapod kaining “amazing” an kabilugan na event sa nasabing provincia, puon sa preparasyon hasta sa pagtatapos kan Palaro.
Marurumduman na opisyal nang kinumpirmar kan Department of Education na an Quezon City an magiging host kan Palarong Pambansa 2027, an ika-67 na edisyon kan nasabing sporting event.
Ini na an ika-duwang beses na an Quezon City an magho-host, makalihis kan 1996.
Pinaglalaoman na gigibuhon an masunod na edisyon sa Mayo 2027.
Segun ki Belmonte na dakulang oportunidad para sa Quezon City na liwat na maipahiling an kakayanan kan NCR na magdaos nin pambansang sporting event.
Posible man na gamiton an mga pangenot na pasirlidad siring kan UP Diliman, Amoranto Sports Complex, QC M.I.C.E. Center, asin iba pang pampublikong eskwelahan sa ciudad.
