LEGAZPI CITY-–Nakapagrehistro nin panibagong landslide an mga nagkapirang lugar sa probinsya kan Catanduanes huli sa namamateang pag-uuran sa lugar.
Segun ki PDRRMO Catanduanes Emergency Operations Chief, Roberto Monterola, sa intrevista kan Bombo Radyo Legazpi, na an mga nagkapirang mga lugar na nakapagrehistro nin landslide iyo an banwaan kan Caramoran, Pandan, San Andres, Bagamanoc, Bato, asin Baras.
Dugang kan opisyal na na-clear na kan Department of Public Works and Highways an mga naunambitang lugar.
Alagad piglalaoman na magkakaigwa man liwat na mga landslide huli ta nagigin saturated na an kadagaan dara kan warang patod na pag-uuran.
Mientrastanto, pigpaingat man kan opisyal an namamanwaan para maibitaran an ano man na aksidente.
