LEGAZPI CITY-Posibleng nasa haros P1.089 trillion an nawaldas na kwarta sa kurapsiyon sa climate projects poon kan taong 2023, segun sa sarong environmental group na Greenpeace Philippines.
Kairiba na digdi an P560 billion na nakurakot ngonian na taon sana, basado sa mga naibuyagyag sa nagpapadagos na imbestigasyon kan senado sa maanomalyang mga flood control project sa nacion.
Base sa mga datos hale sa National Integrated Climate Change Database and Information Exchange System, ipigbuyagyag kan grupo na ngonian na taong 2025, an nasa kabilugang P800 bilyon na mga climate-tagged projects na pinamamayuhan kan Department of Public Works and Highways (DPWH), kun sain pigtatayang nasa P560 billion an posibleng nawaldas sa kurapsiyon.
Sa tantya kan grupo, na nagaanot sa P248 billion an naibugtak sa flood control projects sana asin nasa P173 billion man an kantidad kan mga nakuwa huli sa mahiwas na katiwalian.
Sinabi man ni Greenpeace campaigner Jefferson Chua na bako ini katanggap-tanggap asin bako sana suboot ini panghahabon sa kaban kan bayan alagad pigpapaluya kaini an kakayahan kan milyon-milyong Pilipino na maka-survive sa krisis sa klima na maikukupara sa grupo na panghahabon sa climate funds.
Sinabi pa kan grupo na an kurapsiyon sa flood control program kan gobierno an kapareho kan “obscene plunder” kun sain an dapat na nakatalaga ini ngani na matabangan an mga Pilipinong makahale sa naglalang mga climate disasters.
