LEGAZPI CITY—Siring kan kadaklan sa mga namamanwaan, dismayado an sarong political analyst sa nangyaring tensyon kan nagkapirang mga kongresista asin lehislador sa liwat na pagbukas kan plenaryo kan Kamara.
Segun ki Political Analyst and Constitutional Law Expert Atty. Michael Henry Yusingco, sa intrevista kan Bombo Radyo Legazpi, ipigdoon kaini na an trabaho kan lehislador an maggibo nin ley na masimbag sa mga problema kan komunindad,
Pighayag kaini na naggagastos an mga tax payers nin milyones nganing matugunan an mga problema sa nacion, alagad segun saiya na an nangyayari ngunyan sa mga lehislador an iwal-personal, o ‘nagpapataasan nin ihi’.
Dugang ni Yusingco na warang sala kun magkaigwa nin tensyon, kumprontasyon, o debate alagad dapat mapadapit kuta ini sa mga ley na ipigpapasa ninda.
Segun saiya na an mga ‘tensyon’ na ini an mas patungkol sa pagigin ‘performative tension’ o piggagamit an pagkakataon nganing magpasikat asin bako hale sa sinserong dagit huli sa dae nagigibo an saindang trabaho.
Nagpapahiling man suboot ini nin ‘showmanship’ o pakitang tawo para sa 2028 elections para sa saindang sadiring political agenda.
Mientrastanto, sinabi man ni Yusingco na dapat tutukan an mga nangyayari sa Mababang Kapulungan asin sa Senado huli sa kinakaipuhan nang mag-isip isip kun siisay an iboto sa 2028; dapat halangkawan an kalidad kan mga ibobotong tawo sa masunod na eleksyon.
