Binisto kan Korte Suprema na pwedesir ikonsider na co-owners nin mga ari-arian an mga same-sex couples na nag-i-ibanan , susog sa Article 148 kan Family Code, basta igwa nin malinaw na patunay kan aktuwal na kontribusyon.
Pinaboran kan Second Division kan Corte Suprema an reklamo kan sarong dating partner para sa dibisyon kan sarong harong asin daga na binakal ninda sa Quezon City, sa ibong kan sa nakapangaran sana ini sa saro sa sainda.
Basado sa desisyon, nagpirma nin Acknowledgment an sarong partner na nagtuga na haros kabanga kan gastos sa pagbakal asin pagtugdok kan ari-arian an gikan sa saiyang dating karelasyon.
Nilinaw kan Korte Suprema na an Article 147 an para sa mga mag-agom na tinugutan na magpakasal, mantang an Article 148 an sakop an mga dai tinugutan na magpakasal, kabali na an mga same-sex couples, kun saen an co-ownership nakabase sana sa aktuwal na mga kontribusyon.
Alagad, pigduon kan Korte Suprema na an mas mahiwas na isyu kan mga deretsos kan mga same-sex couples an dapat na hampangon kan Kongreso asin iba pang sangay kan gobyerno, bako sana kan hudikatura.
