LEGAZPI CITY – Paramientras na ipigpundo kan mga opisyales kan Barangay Gogon, Legazpi City an pagkolekta nin mga basura kan saindang eco-aide kasunod kan pagkapano kan saindang Material Recovery Facility (MRF).
Segun ki Kagawad Richilda Chie Atun sa intrevista kan Bombo Radyo Legazpi na huli sa nakaaging holiday asin semana santa, dae nakolekta kan Office of the City Environment and Natural Resources (OCENR) an mga basura asin sinabayan man kan mga basurang tinambak kan mga nagrilinig sa TUPAD Program.
Nagtao na man sindang abiso na paramientras na limitaran muna an saindang mga basura huli sa dae pa nahahali an mga tambak kan basura sa saindang Material Recovery Facility.
Problema man ninda an direktang pagtapok kan saindang mga residente sa MRF imbis na halaton suboot na maglibot an mga eco-aide.
Pigtaram pa kaini na permihan man na nakukuwa kan OCENR an mga basura alagad na-octaba ini nin pirang aldaw huli sa pag-obserba kan semana santa.
Huli man sa permihang pagkatambak sa saindang MRF an naghagad na sinda nin request sa lokal na gobierno na urualdaw na an pagkolekta kan basura imbes an nakasanayan na scheduling.
Suhestyon niya man na i-recycle na sana an ibang patapok nang bagay sa saindang harong nganing mabawasan man suboot dawa papano an tambak kan mga basurang pigkokolekta.
Abiso ni Kagawad Atun sa mga residente kan Barangay Gogon na mapoon giraray sa pagkolekta an saindang mga eco-aide sa oras na makuwa na kan OCENR an mga basura sa MRF kun kaya kaipuhan ninda nin pagsabot kan lambang gabos.
){kind=link}