Umusad na an apat na impeachment complaint na isinunad laban ki Vice President Sara Duterte.
Ibinale na sa Order of Business an mga rekalmo, binasa kan plenaryo, asin ipinadara ini kan presiding officer kan sesyon na si Deputy Speaker Ferjenel Biron sa House Committee on Justice na pinamamayuhan ni Batangas Rep. Gerville Luistro.
An mga reklamo an isinunad kan Makabayan coalition, sarong koalisyon kan mga civil society group, sarong grupo nin mga padi asin abogado, asin ni Atty. Nathaniel Cabrera.
An referral kan mga reklamo sa Justice committee an nagin hudyat man kan pagpupuon kan one-year bar rule, o pagbabawal na igwa pang maisunad na reklamo laban ki Duterte sa laog kan sarong taon.
Kaiba sa mga alegasyon sa reklamo an suboot salang paggamit kan confidential funds; mga paratang ni Ramil Madriaga, dating aide ni Sara Duterte; suboot ill-gotten wealth asin pagpalyar na magin honesto sa mga sa Statement of Assets, Liabilities, and Net Worth (SALN); asin an patanid kan Bise Presidente ki Presidente Ferdinand Marcos Jr., First Lady Liza Araneta-Marcos, asin dating Speaker Ferdinand Martin Romualdez.
Igwang 60-session days ang Justice committee nganing magsagibo nin mga hearing asin magsumiter nin rekomendasyon kaini sa plenaryo.
Pagbobotohan kan plenaryo an rekomendasyon kan komite. Kaipuhan kan boto nin dae mababa sa one-third kan gabos nin miyembro kan Kamara nganing maipadara sa Senado an Articles of Impeachment. Sa presente an may may 316 na miyembro ang Kamara.
Sa irarom kan Konstitusyon, pwedesir mapatalsik sa puwesto an ikaduwang Presidente huli sa culpable violation of the Constitution, treason, bribery, graft and corruption, other high crimes, o betrayal of public trust.
