Nangapudan si Senador Risa Hontiveros nin tulos na pag-asigurar sa kaligtasan kan mga Pilipino sa Middle East, malinaw na mekanismo para sa repatriation, asin konkretong lakdang nganing protehiran an energy security kan nacion sa hampang kan naglalalang sigalot sa Middle East.
Segun ki Hontiveros, dapat magtinir na naka-alerto asin preparadong magtaong asistensya an Department of Migrant Workers (DMW) asin an Department of Foreign Affairs (DFA) sa kada Pilipinong nangangaipuhan nin proteksyon.
Afuera sa ligtas na pag-uli kan mga Overseas Filipino Workers (OFWs), ipigdoon kan senador na kaipuhan man an malinaw na contingency plans para sa saindang kabuhayan asin para sa posibleng epekto kan krisis sa energy oil asin gas supply kan Pilipinas.
Kasunod kaini, nangapudan an senador sa Department of Energy (DOE) na tulos magpaotob nin short-term safeguards mantang pigbibilog an sarong komprehensibo asin panghaluyan na strategic plan nganing mamantinir an katatagan nin suplay nin enerhiya asin maprotehiran an mga industriya laban sa paghalangkaw kan presyo asin kakulangan sa suplay.
Sa ibong kan naglalalang tensyon naghihingoa man si Hontiveros na mahiro ang United Nations nganig mapugulan an lalo pang paglala kan tensyon asin maibalik an pagrespeto sa international law.
Sa huri, nagpabatid an senador kan saiyang pagkahadit sa suboot gari warang habas na paglaog kan administrasyon nina US President Donald Trump asin Israeli Prime Minister Benjamin Netanyahu sa gyera, siring man an pag-atale kan Iran sa pirang Gulf States, na malinaw na nagraraot sa world peace. Pagdoon pa niya an solamenteng makabuluhang direksyon sa presente an de-escalation, diplomasya asin tulos na pagbabalik sa matoninong na pag-oolay.
