LEGAZPI CITY — (UPDATE) Isasairarom na sa otopsiya an hawak kan 13-anyos na aking lalaki na nadukayang gadan sa Barangay Basicao, Pio Duran, Albay.
Enot kaini, magigirumduman na Marso 19 kan mawara an biktimang si Norly Bronzal asin nadiskubre na sanang wara nang buhay asin naaagnas na kan saiyang pinsan kan Marso 27, harani sa saindang harong.
Pigsasabing garo pa-duyan na naka-gakod an aki kun sain naka-gakod sa kahoy nin guilinan an duwang bitis mantang sa kahoy nin acacia man naka-gakod an payo asin mga kamot.
Igwa pa suboot ini nin mga sinuluan sa hawak na garo ginatungan.
Sa intribista ki PCI Arthur Gomez, tagapagtaram kan Albay PNP, sinabi kaini na hinagad na kan pulisya na isairarom sa otopsiya an bangkay kan aki ngani na maaraman kun ano an talagang kawsa kan saiyang kagadanan.
Dugang pa ni Gomez, an medico-legal doctor gikan sa National Bureau of Investigation (NBI) an masagibo kan eksaminasyon.
Makikipag-koordinar na man suboot sa militar asin Scene of the Crime Operatives (SOCO) an Pio Duran Municipal Police para sa pag-arestar sa dae muna pinangaranan na suspetsado.
Mientrastanto, sinabi kan opisyal na dae pa maberepika sa ngunyan kun totoo an mga naglalakop na bareta na igwa nin duwang aking inilaog sa karton gikan sa Masbate asin dinara sa banwaan kan Pio Duran.
