LEGAZPI CITY – Ikinadismaya kan grupo nin mga parasisira sa ibinuyagyag ni Department of Agriculture Secretary Francisco Laurel Jr. na pinirit suboot siya ni Ako Bicol Rep. Zaldy Co na magtao nin import allocation sa mga kumpanyang saiyang inendorso.
Segun ki Pambansang Lakas ng Kilusang Mamamalakaya ng Pilipinas (Pamalakaya) Chairperson Ka Pando Hicap sa intrevista kan Bombo Radyo Legazpi na dae siya makapanubod na imbwelto an naunambitang kongresista huli ta an aram niya iyo an sarong owner kan construction company na contractor kan mga proyekto kan gobierno partikular na an mga flood control projects.
Ipigpapahiling man suboot kaini na dakula an nagin pakinabang kan pagigin House Appropriations Chairman ni Co nganing masunod an saiyang interes na ngonian pa sana ninda naaraman sa nagin pagbuyagyag man ni Sec. Laurel kun kaya dapat ining imbestigaran asin mapanimbag.
Ikinakigkig niya man na pigba-braso an kalihim ni Co na mag-import nin mga manlain-laing seafood na ibig sabihon an dae suboot nakontento an mambabatas sa mga flood control projects na pigtutubudang kinurakot huli ta nagbalak pang maglaog sa lado kan fish importation.
Pigtaram pa niya na maapod niyang “kapitalista” an mga gawi ni Representative Co huli ta piggagamit niya an saiyang poder para sa pansadiri niyang interes asin negosyo.
Maray suboot na dae tinugutan kan kalihim an kongresista namaisakatupadan an saiyang plano na tawan nin importation permit an mga kompanya kaini na kalimitang pigtatao sa mga commercial fishing lines asin mga kooperatiba.
Pagdoon niya man na malinaw na dapat maggibo na nin lakdang kun pano mapupugo an mga siring kaining klase nin korapsyon sa manlain-laing ahensya kan gobierno bako sana sa Department of Public Works and Highways.
Pighayag man ni Hicap na enkaso naglalaog an mga imported na sira sa mga merkado an naaapektaran an mga saradit na parasisira huli ta pwedesir na sanang bakalon an saindang sira sa hababang kantidad na nagreresulta man sa saindang pagkalugi.
