LEGAZPI CITY—Ipigdoon kan mga grupo nin mga parasisira na dapat umatras an Pilipinas sa pakikisumaro sa ibang mga nacion na piggagamit an mga kadagatan o kadagaan kaini urog na pag-abot sa Balikatan exercises.
Segun ki Pambansang Lakas ng Kilusang Mamamalakaya Spokesperson Salvador France, sa intrevista kan Bombo Radyo Legazpi, saro ini sa mga mitsa nganing maggibo an China nin ‘kalokohan’ o ano pa man digdi sa Pilipinas.
Pigsabi man ni France na dae masasakripisyo sa Balikatan exercises an Japan o Estados Unidos kundi an Pilipinas huli sa yaon digdi an saindang mga makukusog na armas na pwedesir magin peligroso sa nacion en kaso na magkaigwa nin giyera an Tsina asin an mga naunambitang lugar.
Pangapudan pa niya dapat na mapundo na an pangha-harass kan China sa mga lokal na parasisira.
Siring man na dapat na makiaram an lambang Pilipino sa pinaglalaban kan grupo huli sa an saindang ipiglalaban iyo an soberanya kan Pilipinas.
