LEGAZPI CITY – Nanotaran kan grupo nin parasisira na nagbaba an presyo kan mga sira sa rehiyon kan Bicol partikularmente na sa Bulan, Sorsogon.
Segun ki Pambansang Lakas ng Kilusang Mamamalakaya ng Pilipinas (PAMALAKAYA) Secretary General Salvador France sa intrevista kan Bombo Radyo Legazpi na dae sinunod kan Department of Agriculture (DA) asin Bureau of Fisheries and Aquatic Resources (BFAR) an promesa sa saindang sektor na pagtatao nin makinarya na makakatabang sa pagpreserba kan mga sira sa kada rehiyon.
Punto niya na kun dakol an nadadakop na sira, pigbabarat ini kan mga negosyante na dakulang tabang kuta kun nabubugtak ini sa mga storage facilities kaysa ipabakal sa baratong presyo asin papatungan nin dakulang kantidad.
Pagdoon niya man na dae kinakaipuhan kan gobierno na mag-import nin sira hale sa ibang nacion huli ta may mga negosyante pang pigbabarat an mga lokal na parasisira na nagigin rason kun nyata dae ini nakakabawi huli sa labing halangkaw kan presyo kan produktong petrolyo asin mga babarakalon.
Pigdugang pa kan opisyal na kadaklan sa mga parasisira sa presente an nagpundo na muna sa paglalawod asin an iba man an nakikisakay na muna sa paglalawod kan ibang darakulang bangka huli ta dae na nakakaya an padagos na pagtaas kan saindang konsumo sa gasolina asin naghahanap nin ibang mapagkakakitaan.
Pwedesir man suboot na ginamit kan mga kapitalista an Semana Santa nganing makapanglamang sa kapwa kun sain pigpapabakal sa halangkaw na kantidad an mga sirang nabarat ninda sa mga lokal na parasisira.
Pangapodan ni France sa gobierno na suspendiron na an buwis sa petrolyo asin gamiton an mga nakolektang buwis sa mga nangangaipuhan partikularmente na an sektor nin pagsisira ngonian na may pigkakahampang na krisis ang Pilipinas.
