LEGAZPI CITY – Nanghihinayang an Pambansang Lakas ng Kilusang Mamamalakaya ng Pilipinas (Pamalakaya) sa mga nasayang na tamban partikularmente sa banwaan kan Bulan, Sorsogon.
Segun ki Pamalakaya Chairperson Pando Hicap sa intrevista kan Bombo Radyo Legazpi na afuera sa nasayang na mga sira, nasayang man an pagal asin gastos kan mga parasisira sa paglalawod makalihis an mga report na warang nagbakal sa mga ini.
Ipigpapahiling sana suboot kaini na warang piggigibong lakdang an gobierno nganing matabangan an mga parasisira bako sana sa kabikulan kundi pati na sa enterong nacion.
Pigtuyaw niya man an local na gobierno huli ta haloy nang may mawot na magtindog nin dakulang canning factory alagad dae ini natutugutan na dakulang tabang kuta nganing malikayan an mga insidente nin pagkasayang kan mga sira.
Pigsuhestyon man kan opisyal na dapat magkaigwa nin post harvest facility sa provincia kan Sorsogon nganing dae masamantala an mga ini kan mga trader asin dae man masayang an mga nadadakop kan mga sira enkaso warang magbakal kaini maski pa in-demand an mga sira tuyong Holy Week.
Suspetya niya man na dakula suboot an lugi kan mga parasisira sa banwaan kan Bulan urog na kun pag-oolayan an gastos ninda sa gasolina na padagos man an paghalangkaw kan presyo huli sa kariribukan sa Middle East alagad wara an mga ini na magiginibo kundi magpadagos sana sa paglalawod.
Pangapodan ni Hicap sa gobierno na maggibo na nin magkakanigong lakdang nganing dae na mautro liwat an nangyari sa provincia kan Sorsogon sa iba pang parte kan kadagatan kan Pilipinas mantang nagpagirumdom man sa mga parasisira na magkuwa sana kan sira na kaya nindang maipabakal nganing dae man ini masayang.
 regrets the wasted trees particularly in the town of Bulan, Sorsogon.){kind=link}