Naging matoninong an enot na resupply mission kan Pilipinas sa Ayungin shoal makalihis an nabilog na agreement sa China.
Segun sa Department of Foreign Affairs, wara nin naireport na insidente sa pagbiyahe kan mga barko kan Pilipinas na nagdara nin suplay sa mga suldadong nagbabantay sa BRP Sierra Madre sa Ayungin shoal.
Ginamit sa resupply mission an civillian vessel na MV Lapu-Lapu na sinabayan kan BRP Cape Engaño kan Philippine Coast Guard.
Pinasalamatan naman kan Department of Foreign Affairs an pagtatarabangan kan Philippine Navy, Philippine Coast Guard, National Security Council asin Department of National Defense ngani na maging matrayumpo an operasyon.
Magigirumduman na kan nakalihis na semana kan magkaulay an delegasyon kan Pilipinas asin China kung sain nabilog an arrangement na obhetong maibitaran na an mga eskwentro sa pinag-aagawang teritoryo.
Inasegurar man kan Department of Foreign Affairs na an Pilipinas man giraray an nakakasakop sa Ayungin shoal sa ibong kan nilaog na agreement sa China.
