LEGAZPI CITY-Nagpagirumdom an Department of Labor and Employment (DOLE) sa mga employer na obligadong itao an 13th-month pay sa saindang mga empleyado na dai malagpas sa Disyembre 24.
Segun kay DOLE Secretary Bienvenido Laguesma, warang exemption sa pagtatao kan benepisyong ini huli sa ipigkokonsidera statutory right kan gabos na mga manggagawa asin para sa panggastos kan saindang pangangaipohan kan mga pamilya ngonian na holiday season.
Sakop kan 13th-month pay an gabos na rank-and-file employees sa pribadong sektor, anuman an saindang posisyon, employment status, o paagi kan pagpapasahod, basta’t nakapagtrabaho sinda nin sarong bulan ngonian na taon.
Kaiba an piece-rate workers, empleyadong may fixed wage plus commissions, workers with multiple employers, dating nag-resign o nahale sa trabaho asin mga nag-maternity leave na may salary differential.
An minimum na 13th-month pay an katumbas kan one-twelfth (1/12) kan kabuuang basic salary na kinita kan sarong manggagawa sa laog nin sarong taon.
Pagirumdom man kan ahensya sa mga employer na magsumiter kan saindang compliance report sa DOLE Online Compliance Portal sagkod Enero 15, 2026, na naglalaog kan impormasyon mapadapit sa kumpanya bilang empleyado, listahan kan benepisyaryo, asin kantidad kan naresibeng benepisyo.
