LEGAZPI CITY-Pigklaro kan Department of Health (DOH) na wara nin kaso kan Ebola virus sa Pilipinas.
Sinabi ni DOH spokesperson Undersecretary Albert Domingo na warang rason ngani mag-panic an mga Pilipino sa tahaw kan pigbabaretang paglakop kan helang sa Democratic Republic of the Congo.
Sa ngonian, hababa suboot an peligro na magkaigwa nin kaso sa nacion huli ta harayo ini sa West Africa kun sain nairehistro an Ebola outbreak.
Pig-anunsyo man kan opisyal kan DOH na wara man nin rekomendadong travel ban an World Health Organization (WHO) kun kaya dae man ini iimplementar kan nacion.
Sa ibong kaini, sinabi kan opisyal na ipapaotob kan Bureau of Quarantine an mahigot na screening kan mga biyahero hale sa Democratic Republic of the Congo asin Uganda.
Magigirumduman na dati nang pigdeklara kan WHO an Ebola outbreak sa mga nasambitang nacion bilang public health emergency of international concern.
Mientrastanto, sinabi pa ni Domingo na pig-aadalan kan mga eksperto kan WHO an mga posibleng pagbulong sa Bundibugyo virus na nagin kawsa kan Ebola outbreak, arog kan remdesivir, na dati nang ginagamit bilang bulong laban sa COVID-19.
Abiso kan opisyal kan DOH sa publiko na pakusugon an resistensya ngani na maibitaran na maolakitan kan helang, na naitra-transmit sa paagi kan body fluids.
