LEGAZPI CITY-Nagpatanid si Defence Secretary Gilberto “Gibo” Teodoro sa publiko laban sa delikado asin maating parus dara kan nagpapadagos na wildfires sa Kalimantan, Indonesia.
An mahibog na ambon o haze nakaabot na sa Metro Manila asin pagtaraid na mga rehiyon, na nagdeklarar nin unhealthy to very unhealthy quality of air sa mga ciudad nin Manila asin Quezon City.
Segun sa Department of Health (DOH), an aso nagigin kawsa nin kadipisilan sa paghangos, matinding pag-abo, pagkulog kan daghan, asin pag-irita kan mata.
Huli kaini, an mga kaakian, mga senior, asin mga indibidwal na may helang sa puso o pulmon arog kan hika,inaabisuhan na mag-doble ingat.
Pig-eksplikar kan kalihim na maski taon-taon nangyayari an mga wildfire sa Indonesia asin pirmihang nakakaapektar sana sa Malaysia asin Singapore, nakaabot ini sa Pilipinas huli sa kusog kan kalayo asin kusog kan duros na pigtutuklang kan Habagat.
Piglalaoman na magtetenir pa nin pirang aldaw an haze kun kaya inabisuhan kan mga otoridad an publiko na limitaran an mga aktibidad sa luwas nganing maibitaran an helang.
Nangapudan man si Teodoro sa publiko na pirming magsulot nin facemask asin magtenir na updated sa mga detalye kan insidente asin mga lakdang ngani na magin ligtas.
